Parte hartu AranakoLore Kulturarteko astean!
Osteguna, 1 ekaina 2017Bigarren urtez jarraian, Arana auzoko kolektibo eta elkarte ezberdinek auzoko Jaiak giro ezberdin eta inklusibo batean ospatzeko proposamena luzatzen diete biztanleria gasteiztarrari orokorrean eta Arana auzoko bizilagunei espresuki.
Era honetara, Kulturarteko aste honen programazioa ekintza eta proposamen askoz josia dator: parte hartze graffitiak, kulturarteko zineforoa, adin guztiei zuzendutako koreografien klase irekia, haur jolasak, break dance erakustaldi eta master class-a, esate baterako. Ekintza hauek guztiek bizikidetza eta adin eta kultura eta jatorri ezberdinetako pertsonen arteko hartu-emanetarako guneak sustatzeko helburua dute.
Ekintza nagusi bezala, ostiralean, ekainaren 3an extremadura kalean eta 21:30etatik aurrera ospatuko de “Munduko Txokoen” ekimena aipatu daiteke. Bertan jatorri eta herrialde ezberdinetako pertsonek eta kolektiboek (Senegal, Pakistan, Dominikar errepublika, Ruanda, Kolonbia, Kamerun, Mexiko etab) beraien kultura eta herrietako pintxo eta jaki ezberdinak eskainiko dituzte.
Ekimen honetan medicusmundi Arabak proposamen goxoena eskainiko du: bidezko merkataritzako edateko txokolatea eta gaileta bat eskainiz.
medicusmundi Arabak lehen aldiz parte hartuko du AranakoLore ekimenean, kulturarteko gizarte inklusibo baten aldeko bere apustua berretsiz eta aurten ospatzen dugun gure elkartearen 50. urteurrenaren ospakizunak aprobetxatuz.
Auzoko jaiak giro ezberdin batean bizi itzazue!